Fitaccen jarumin barkwanci a fina-finan Hausa na Kannywood, Musa Mai Sana’a, ya ce yana matukar nadama a game da tsinewa ko la’antar kansa da ya ke a cikin wasu fina-finansa da ya yi.
A cikin wata tattaunawa da BBC ta Instagram, Mai Sana’a ya ce a da ya yi hakan saboda rashin kwarewa.
Amma a hankali- a hankali sai ya fahimci cewa wannan abu da ya ke fa ba abune mai kyau ba.
Ya ce “Da farko-farkon fina-finai na na yi ta yin abubuwa wadanda ni a ganina dai-dai ne, amma daga bisani bayan da wasu mutane suka ja hankalina a kan abubuwan musamman zagi ko tsinewa kaina da nake, sai na fahimci cewa lallai yakamata na daina”.
Musa Mai Sana’a, ya ce a yanzu ya kara fahimtar abubuwa a fina-finan hausa na Kannywood, kuma ga girma ma da yazo.
Don haka dole wasu abubuwa a jingine su a daina, musamman da ya ke ga shi an fara tara iyali dole a daina wasu abubuwan a cikin fina-finai inji jarumin.
Mai Sana’a ya ce, shi a fina-finansa ana gani kamar yana wuce gona da iri, to sam shi ya ba ya haka.
Ya ce, “Ina yin fina-finai na ne domin nishadi da kuma fadakarwa, kuma na fi yin fina-finai ne ma a kan batun da ya shafi iyaye da ‘ya’yansu“.
Duk abin da aka nayi a cikn fim to fadakarwa nake domin masu irin wannan hali da na yi a ciki fim su dauki darasi su daina inji Mai Sana’a.
Join Our WhatsApp Channel
Get verified job vacancies, career tips, scholarships and opportunities delivered straight to your phone, free and as soon as they're posted.
.jpeg )
