Wata matar aure da ta yi garkuwa da mijinta ta karbi kudin fansa ta shiga hannun hukuma.
Dubun matar ta cika ne bayan sun karbi kudin fansa Naira miliyan biyu bayan ta yi garkuwa da mijin nata.jaridar aminiya na ruwaito.
Sai dai ta shaida wa ’yan sanda cewa, “Wanda ya yi garkuwa da shi ya karbi kudin fansa Naira miliyan biyu, amma bai ba ni kasona daga ciki ba, ko kamannin kudin ban gani ba.”
Ta bayyana cewa ta sa an yi garkuwa da shi ne saboda rashin kwanciyar aure da ita da kuma watsi da ’ya’yansu.
Matar dai tana cikin mutum 29 da ’yan sanda suka gabatar wa ’yan jarida kan zargin garkuwa da mutane da sauran laifuka aa Jihar Akwa Ibom.
A cewarta, sakamakon watsi da ita da maigidanta ya yi ta fara yin aikatau domin ciyar da kanta da ’ya’yansu bayan mijin ya auri wata mata.
Hakan ne, a cewarta ya tilasta ta kitsa sace shi domin ta samu kudin kula da kanta da ’ya’yanta daga hannunsa, amma ta yi rashin sa’a asirinsu ya tonu ba tare da an ba ta rabonta daga cikin kudin ba.
Magidancin da aka kubutar, ya ce tun ranar 21 ga watan Yuli, 2022 aka yi garkuwa da shi a harabar gidansa.
Da yake jawabi, Kwamishinan ’Yan Sandan Jihar Akwa Ibom, Olatoye Durosinmi, ya ce rundunar ba za ta yi kasa a gwiwa ba, wajen murkushe ayyukan laifi a fadin jihar.
WANI LABARI : Matan Kannywood Sun Ziyarci Shugaban Hisbah A Kano
Shugaban Hukumar kuma Babban Kwamandan Hisbah a Kano, ya bayyana farin ciki da ziyarar, duba da cewa manufofin kungiyar sun yi daidai da ayyukan hukumarsa na dakile ayyukan barna.
Hukumar ta kuma amince ta bai wa kungiyar matan na Kannywood goyon baya wajen cim-ma manufofinta na gyara a sana’arsu ta fina-finan Hausa.
A nata jawabin, Mataimakiyar Babban Kwamandar Hisbah, Ummu Kulthum Kassim, ta yaba wa kungiyar bisa shirinta na tsaftace harkar fina-finan Kannywood, da kuma yadda wasu daga cikin jaruman Kannywood mata ke kokarin kyautata mu’amalarsu da kuma kamun kai.
A jawabinsa, Mashawarcin Gwamnan Kano kan Hukumar Hisbah, Mujjitaba Baban Usama, kira ya yi ga matan da su tsarkake niyyarsu da kuma aiki don Allah.
Tun da farko, a jawabin shugabar kungiyar, Rashida Abdullahi Mai Sa’a a, ta ce sun kawo ziyara ne don gabatar da sabuwar kungiyarsu ta AKAFA da manufofinta ga hukumar, da nufin tsaftace harkar fim.
A baya dai Hukumar Hisbah ta sha kamen mata a matattarar yin badala da gantali, wadanda ta ce ’yan fim ne.
