Shugaban Karamar Hukumar Lokoja, Hon. Mohammed Danasabe Muhammad, ya rasu.
Daily Trust ta rawaito cewa an tabbatar da rasuwarsa da misalin karfe 4:30 na safe a wani asibiti da ke Lokoja babban birnin jihar.
An garzaya da Muhammed asibiti bayan da ya faɗi a gidansa.
An ce ya halasci tarurrukan siyasa ne na shirye-shiryen zaben gwamnan da za a yi a gobe Asabar.
Wata majiya daga dangin mamacin ta ce an garzaya da shi asibitin Shifa, Lokoja, jim kadan bayan ya rufta a gidan da yammacin ranar Alhamis.
“Likitoci sun tabbatar da mutuwarsa a asibiti da misalin karfe 4:30 na safiyar ranar Juma’a,” in ji wani dangin da ya nemi a sakaya sunansa.
Marigayin ya fito ne daga mazabar B dake yankin Lokoja.
Za a yi jana’izarsa a makabartar Musulmi ta Unguwan Kura bayan sallar Juma’a.
.jpeg )
